شہیدِ عشق ہوئے قیس نامور کی طرح ـــــ میر ببر علی انیس

شہیدِ عشق ہوئے قیسِ نامور کی طرح​

جہاں میں عیب بھی ہم نے کیے ہنر کی طرح​

​

کچھ آج شام سے چہرہ ہے فق سحر کی طرح​

ڈھلا ہی جاتا ہوں فرقت میں دوپہر کی طرح​

​

تمہارے حلقہ بگوشوں میں ایک ہم بھی ہیں​

پڑا رہے یہ سخن کان میں گہر کی طرح​

​

نحیف و زار ہیں کیا باغباں سے زور چلے​

جہاں بٹھا دیا بس رہ گئے شجر کی طرح​

​

خدا جہاں میں سلامت رکھے تجھے اے قبر​

کہ سوئے پاؤں کو پھیلا کے اپنے گھر کی طرح​

​

ہماری قبر کو کیا احتیاجِ عنبر و عود​

سلگ رہا ہے ہر اک استخواں اگر کی طرح​

​

سیاہ بختوں کو یوں باغ سے نکال اے چرخ​

کہ چار پھول تو دامن میں ہوں سپر کی طرح​

​

تمام خلق ہے خواہانِ آبرو یا رب!​

چھپا مجھے صدفِ قبر میں گہر کی طرح​

​

تجھ ہی کو دیکھوں گا جب تک ہیں برقرار آنکھیں​

مری نظر نہ پھرے گی تری نظر کی طرح​

​

انیسؔ یوں ہوا حالِ جوانی و پیری​

بڑھے تھے نخل کی صورت گرے ثمر کی طرح​

۔۔۔​

میر ببر علی انیسؔ